УЛОГАТА НА УЧИЛИШНИТЕ ОДБОРИ ВО ПРОМЕНИТЕ ЗА МИО

Во рамките на проектот на УСАИД за меѓуетничка интеграција во образованието,што се реализира во соработка со Министерството за образование и наука, Бирото за развој на образованието и Центарот за стручно образование и обука,вчера, 27.04.2013 г. во хотелот Континентал во Скопје, се одржа обука на тема „Улогата на УО во промените за меѓуетничката интеграција, на кој учествуваа по двајца претставници на УО од училиштата на пилот-општините Битола, Бутел, Тетово и Струмица.

На обуката се работеше во две групи по следнава агенда:1. Воведување на УО во активностите на ПМИО. 2. Улогата на УО во промените за меѓуетничка интеграција во образованието (I и II дел)3. Рефлексија и евалуација на обуката.

Нашето училиште го претставувавме јас (како претставник од наставниот кадар на УО и Билјана Петрова, претставник од родителите.

Главна цел на обуката беше претставниците на УО да се запознаат со концептот за меѓуетничка интеграција во образованието и да се стекнат со знаења и вештини за примена на приодите и стратегиите за подобрување на состојбите во поглед на меѓуетничката интеграција на ниво на училиште.

Потоа, ние, претставниците на УО, ќе треба да ги пренесеме стекнатите знаења на своите колешки и колеги за да можат да го дадат својот придонес во креирањето на училишните политики и стратегии за унапредена меѓуетничка интеграција во училишната атмосфера.